Ang Masigasig na Paghahanda ng DOE sa Hinaharap

Mga programa at proyekto ng DOE para sa geothermal energy[1]

Layon ng DOE na magsagawa ng panlabas at panloob na promosyon ng mga investment opportunity para sa geothermal energy ng Pilipinas. Sa gayon, maeenggayno ang mga pribadong sektor na magbuhos ng investment para sa geothermal exploration at paglilinang nito, at gayundinang pagpasok sa bansa ng mga moderno at kapaki-pakinabang na teknolohiya para sa geothermal energy. Ang mga programa para sa exploration kabilang ang mga reconnaissance activity at semi-detailed studies ng mga potensyal na geothermal area ay patuloy na ipapanatili upang makapagbigay ng kapaki-pakinabang  na impormasyon para sa mga prospektibang mga developer at investor. Ang paglulunsad ng socio-economic profiling para sa hindi bababa sa pitong prospect ay pananatilihin rin upang magbiga ng kaukulang impormasyon para sa geothermal utilization demand sa mga target area.

·       Optimal na paggamit ng mga non-power application – Bilang testamento sa pagpupunyagi ng pamahalaang linangin ang non-power application ng mga bukal ng geothermal ng bansa, may mga nilikhang proposal para sa isang proyektong multi-crop dryer sa Leyte at proyektong pagpapahusay ng self-reliant multi-crop dryer sa Manito, Albay. Sa Timog Negros kung saan matatagpuan ang Palinpinon geothermal complex, isang proyektong nauukol sa pamamahala sa operasyon ng isang lokal na kooperatiba para sa mga produktong agrikultural ang isinasagawa. Dagdag pa rito, bumuo rin ng pakikipag-ugnayan ang DOE sa Department of Tourism (DOT) at sa Philippine Institute of Traditional and Alternative Health Care (PITAHC) upang lalo ipakilala ang mga hot spring area upang mabuksan ang posibilidad sa paglilinang ng mga spa resort sa mga naturang lugar – at maipapakita ng proyektong ito na ang geothermal energy ay maaari ring gamitin para sa balneology at therapy. Magsasagawa rin ng site assessment sa apat pang lugar kabilang ang Camiguin Island sa Cagayan, Mt. Apo sa Cotabato, Northern Negros at sa Tuba sa Benguet.

Isang Memorandum of Agreement (MOA) ang nilagdaan noong Mayo taong 2002 upang bigyang-linaw ang antas ng kooperasyon sa mga kasapi ng mga naturang proyekto. Pangungunahang ng DOT implementasyon ng proyekto at ito rin ang maghahanda ng mga investment promotion package para sa spa resort development. Ang DOE naman ang tutuklas sa mga pinakamainam na hot spring areas para sa mga spa resort development. Ang PITAHC ang mamamahala sa pagbibigay ng training sa mga lokal na mamamayan para sa therapeutic massage at sa paggamit ng mga herb at halamang-gamot sa therapy.

·        Masusing promosyon ng geothermal energy – Layon ng DOE na palawigin ang promosyon ng geothermal energy exploration at development. Upang ipakilala ito sa mga mamamayan, magsasagawa ang Departemento ng mga public awareness campaign bilang daan na rin sa pag-engganyo ng mga investment mula sa pribadong sektor para sa mga geothermal projects. Gayundin, layon rin nitong isulong ang pagtanggap sa geothermal energy at sa pagpapaisa ng mga mamamayan tungkol sa mga usaping pangkalikasan at panlipunan na masusing naibabalangkas sa pagpasa ng mga batas na NIPAS at IPRA.

Nakipag-ugnayan rin ang DOE sa DENR tungkol sa posibilidad na gamitin ang mga geothermal area bilang mga airshed. Sa ilalim ng Memorandum Circular (MC) No. 2002-13 ng DENR, ang mga geothermal airshed ay igagawad sa mga geothermal area na may mga kasalukuyang aktibong proyekto at kabilang sa listahan ng PEP, at gayundin, ang mga lugar na kikilalanin ng DOE at mga lugar na maaaring maapektuhan ng pagkalat ng mga air pollutant mula sa pagpapatakbo ng mga pasilidad ng geothermal energy. Ang mga gabay na nakabalangkas sa naturang MC ay inaasahang makatutulong sa pagbibigay-epekto at pagsunod ng sektor ng geothermal energy sa Republic Act 8749 o ang Clean Air Act.

---

[1] "Geothermal Energy." DOE Portal. Department of Energy, 2005. Web. http://www.doe.gov.ph/ER/geothermal.htm  salin sa Filipino

Masidhing Pandaigdigang Interes sa Geothermal Energy

Ang World Bank at ang Sustainable Energy For All

Ang pagbibigay-suporta sa paglilinang at pagpapalawig ng geothermal energy sa mga developing country ay isa sa mga konkretong paraan upang maaskyunan ng Bank Group ang pandaigdigang inisyatibo na Sustainable Energy for All (SE4ALL) ng United Nations. Nilalayon ng SE4ALL na pagsapit ng taong 2030 ang makapagbigay ng pandaigdigang energy access, pagdodoble ng papel ng renewable energy sa pandaigdigang energy mix, at ang pagdodoble ng rate of improvement ng kalinangan ng enerhiya. Nakipag-ugnayan ang presidente ng Bank Group na si Dr. Jim Yong Kim kay UN Secretary-General Ban Ki-moon upang magsilbi bilang  co-chair ng advisory board na magbibigay ng kaukulang paggabay para sa inisyatibong Sustainable Energy for All.

Kung ihahambing sa iba pang anyo ng renewable energy, tunay na malaki ang kinakailangan kapital para sa mga proyektong nauukol sa geothermal energy sapagkat kinakailangan ang exploration upang matingnan ang atkwal na potensyal ng mga bukal ng geothermal, at kinakailangang magsagawa rito ng mga preliminary test drilling. Kinakailangang makapagbuhos ng investment ang isang developer kahit na wala pang garantiya na mababawi ito (rate of return) para lamang makita kung maaaring mapakinabangan ang isang bukal. Bukod pa rito, ang mga proyektong geothermal ay mas matagal ring umusuad mula sa kauna-unahang exploration activities hanggang sa operasyon ng planta at paglikom ng mga revenue. Gayunpaman, para sa mga bansang malaki ang potensyal sa geothermal energy, malaki ang maitutulong ng bukal na ito kung mapapakinabangan. Isa ring rehiyong tinatayang mayaman sa geothermal energy ay ang Silangang aprika, kung saan sinasabing ang geothermal potential ng Rift Valley ay sapat upang makapagsuplay ng kuryente sa humigi-kumulang 150 milyong kabahayan. Nakikipag-ugnayan ang Bank Group sa bansang Kenya sa Silangang Aprika at nagbibigay-suporta sa pamamagitan ng pagbibigay ng concessional funding para sa mga unang paksa ng geothermal development.

Sa kasalukuyan, halos 16 na porsyento lamang ng mga mamamayan ng Kenya ang may akses sa kuryente, kung kaya’t hangarin ng pamahalaan nito na doblehin ang paggamit ng geothermal energy upang makapagbigay ng malinis na kuryente, makatulong sa mga maliliit na negosyo, at paghusayin ang seguridad sa mga komunidad. Gayunpaman, lumalaki na ang papel na ginagampanan ng geothermal energy sa bansa sa pagprodyus nito na katumbas ng 13 porsyento ng kabuuang kuryente ng Kenya, at ang hangarin ay pataasin pa ang bahagdan ng hanggang 30 porsyento pagsapit ng 2020. Nakapagbigay na ng aabot sa US$300 milyon ang World Bank bilang suporta mula taong 1978[1].

Marami pang bansa ang kahalintulad ng Kenya pagdating sa potensyal sa geothermal energy. Ayon kay Pierre Audinet, ang Team Leader ng Clean Energy Program sa Energy Sector Management Assistance Program (ESMAP) ng World Bank, “For many developing countries, this is a potentially transformative resource.” Gayunpaman, kinakailangan ang pagkakaisa ng iba’t-ibang mga bansa, at naghahanda ang World Bank at ESMAP ng isang Global Geothermal Development Plan upang makapaglikom ng kinakailangang pondo para sa geothermal development. Ang mabubuong pakikipag-ugnayan sa mga ahensyang mamamahala sa bilateral funding at sa iba pang mga multilateral na bangko ay magtutuon ng pansin sa mga rehiyong tinatayang may malalaking potensyal at magbibigay ng pondo para sa test drilling. Sa gayon, layon nitong palawigin ang mga pribadong investment sa iba pang paksa ng geothermal value chain[2].

Patuloy na lumalago ang suporta ng World Bank Group para sa paglilinang ng geothermal energy. Mula sa US$73 milyon noong 2007, ito ay umakyat sa US$336 milyon noong 2012[3]. Ang bahagdan ng geothermal energy ay ang bumubuo sa 10 porysento ng kabuuan ng pagpapautang ng World Bank para sa renewable energy[4],  at maaari pa itong lumago dala ng naturang Global Geothermal Development Plan.

Kasunod:  Ang Masigasig na Paghahanda ng  DOE sa Hinaharap

---

[1] ESMAP. Drilling Down on Geothermal Potential: An Assessment for Central America. (2012): Web

[2] Ibid.

[3] Ibid.

[4] Ibid.

Pagtatangi sa Potensiyal na Geothermal: Ang Modelo ng El Salvador

Mapalad ang mga Bansang Kabilang sa "Ring of Fire"

Sa loob ng nakalipas na dalawang dekada, ang pandaigdigang installed geothermal capacity ay dumoble[1]. Gayunpaman, tulad ng nabanggit hindi pa rin lubusang napapakinabangan ang geothermal energy. Dahil kabilang rin sa Pacific Ring of Fire, isa ang Gitnang Amerika sa mga rehiyon sa mundo na masusing tumitingin sa geothermal energy bilang isang kapaki-pakinabang na bukal ng enerhiya. Tinatayang nagtataglay ang rehiyon ng angking potensyal para sa geothermal energy na aabot sa 13,000 MW[2]. Subalit sa kasalukuyan, hanggangg 506 MW lamang ang napapakinabangan ng rehiyon[3] habang nananatili itong nakatali sa pag-aangkat ng mga produktong petrolyo at iba pang fossil fuel.

Kilala ang El Salvador bilang “lupain ng mga bulkan,” at ito ang pinakamalalking prodyuser ng kuryente mula sa geothermal energy sa buong rehiyon (204 MW). Sa kabila ng isang pagsabog ng digmaang sibil noong dekada 80  at dalawang mapaminsalang lindol noong 2001, nagawa pa rin ng bansang linangin ang sektor nito sa geothermal energy. Sa katunayan, ang kuryenteng nagmumula sa geothermal energy na dumadaloy sa pambansang grid ay maaaring ikumpara sa kuryenteng nagmumula sa mga hydroelectric at fossil fuel na planta. Plano rin ng El Salvador palaguin pa lalo ang sektor na ito para sa hinaharap at upang makamit ang pagprodyus ng 40 porsyento ng kuryente ng bansa mula sa geothermal energy pagsapit ng taong 2020. Pinaplano ng geothermal developer ng bansa na La Geo na magdadag pa ng dalawang geothermal facilities sa Ahuachapán at Berlín, at gayundin ang pagtatatag ng mga exploration facilities sa tatlo pang mga geothermal fields.

Ang modelo ng El Salvador ay nakapagbibigay rin ng magandang ehemplo para sa iba pang mga bansa sa Gitnang Amerika upang linangin ang kani-kanilang mga bukal ng geothermal energy. Sa katunayan, tinatayang may higit pang malalaking potesnyal ang mga bansang Nicaragua, Guatemala, at Costa Rica[4].

Malaking bagay para sa El Salvador ang asiste ng pamahalaan nito para sa pagtutuklas at pag-aaral (exploration) ng mga potensyal na geothermal field ng bansa. Ang initial exploration stage para sa geothermal energy ay maaaring magkahalaga ng hanggang US$40 million[5] – at hindi ito nagbibigay ng garantiya na ang naturang geothermal field ay maaaring gamitin para sa operasyon at para sa return of investment sa bahagi ng developer.

Samakatuwid, hindi lamang ang mga bansa sa Latin America ang inuudyok na linangin at pakinabangan ang kanilang mga angking potensyal sa geothermal energy, ang mga bansa rin sa Silangang Aprika at Asya (kabilang ang Pilipinas) ay bahagi rito.

Kasunod:   Masidhing Pandaigdigang  Interes sa Geothermal Energy

---

[1] "Installed Generating Capacity." IGA International Geothermal Association. IGA, 16 Jun 2011. Web.  http://www.geothermal-energy.org/226,installed_generating_capacity.html

[2] Salas, José Roberto Estévez. Geothermal Power Plant Projects in Central America: Technical and Financial Feasibility Assessment Model. (2012): Web

[3] Aheam, Sean. "El Salvador: The “Land of Volcanoes” and Geothermal Energy." Worldwatch Blogs. 8 Jan 2013. Web. http://blogs.worldwatch.org/revolt/el-salvador-the-land-of-volcanoes-and-geothermal-energy/

[4] Ibid.

[5] ESMAP. Drilling Down on Geothermal Potential: An Assessment for Central America. (2012): Web

Pagsuporta sa Renewable Energy: ang Halimbawa ng Google Green

Pananaw na Progresibo at Nakatutok sa Ikabubuti ng Kinabukasan

Bukod sa pagiging tanyag sa buong daigdig ang Google bilang isang higante sa Internet at sa larangan ng Information Technology o IT, ang Google ay isa rin sa mga pandaigdigang kumpanya na nagsusulong ng higit na malawakang paggamit at paglilinang ng renewable energy. 

Sa website ng Google Green, malinaw at detalyadong inihayag ang mga panutuntunan at pananaw ng kumpanya para sa pagtataguyod ng pag-gamit ng renewable energy, hindi lamang bilang mahalagang hakbang tungo sa pangangalaga ng kalikasan, kung hindi bilang isa na ring pagkakataong mamumuhunan, alang-alang sa ikabubuti ng kinabukasan.

Katunayan, ang kumpanya ay nagmamay-ari ng mga sasakyang pinapatakbo sa pamamagitan ng pagrerecharge sa isang 1.6 MW na solar array. May investment rin ang Google sa ilang energy company sa Estados Unidos katulad ng AltaRock Energy (na nakatuon sa pagkakabit ng mga geothermal system) at Potter Drilling, eSolar at BrightSource Energy na pawang nakatuon sa solar power, at ang Makini Power na isang wind company[1].

Sa pamamagitan ng sanga nito na Google.org, plano ng Google na magbuhos ng may US$10 milyon bilang puhunan sa mga Enhanced Geothermal System (EGS) sapagkat nakikita ng kumpanya na sa mga anyo ng renewable energy, ang geothermal energy ang siyang may pinakamalaking prospektiba para sa hinaharap[2]. Ito ay bahagi ng inisyatibo ng kumpanya na pinamagatang RE

Dagdag pa rito, bilang bahagi ng pangalawang yugto ng investment na nagkakahalaga ng US$26.5 milyon, magbubuhos rin ang Google ng US$6.25 milyon sa AltaRock Energy, at US$4 milyon sa Potter Drilling[3].

Ayon sa isang pag-aaral ng Massachusetts of Institute of Technology, ang geothermal energy ay sadyang hindi lubusang napapakinabangan ng Estados Unidos.[4] Gayunpaman, malaki ang potensyal ng geothermal energy sapagkat kaya nitong maghatid ng kuryente kapag peak hours – katulad ng mga kumbensyonal na plantang pinapatakbo ng mga fossil fuel – hindi kagaya ng hangin at solar na may mga angking limitasyon. Katulad ng naunang nabanggit, ang kahulugan ng Enhanced Geothermal System ay ang kakayahang magpahitit ng tubig sa mga maiinit na bato sa ilalim ng lupa. Ang napainit na tubig at singaw ay maaaring gamitin upang patakbuhin ang mga turbina ng planta, at  pagkatpos ay maaari muling ipahitit sa ilalim ng lupa[5]. Ayon sa Department of Energy ng Estados Unidos, maaari nitong palawigin ang kakayahan ng geothermal energy ng hanggang 40 beses[6].

Para kay Dan Reicher, direktor ng climate and energy initiatives sa Google.org, maaaring magkaroon ng mahalagang papel ang computing sa pagpapalawig ng  mga enhanced geothermal system dahil maari itong makapagbigay ng mga geological model at simulation. Aniya, "We believe that fundamentally there's an intersection between information technology and energy technology. IT and ET--that's where we are heading in part at Google."[7]

Kasunod:  Pagtatangi sa Potensiyal na Geothermal: Ang Modelo ng El Salvador

---

[1] LaMonica, Martin. "Google energy guru hot on geothermal." Technology News - CNET News. CNET, 14 May 2009. Web.  http://news.cnet.com/8301-11128_3-10240779-54.html

[2] LaMonica, Martin. "Google digs into wallet for geothermal energy." Technology News - CNET News. CNET, 19 Aug 2008. Web.  http://news.cnet.com/8301-11128_3-10020038-54.html

[3] Ibid.

[4] LaMonica, Martin. "MIT-led study finds geothermal energy potential untapped." Technology News - CNET News. CNET, 22 Jan 2007. Web.  http://news.cnet.com/MIT-led-study-finds-geothermal-energy-potential-untapped/2100-11395_3-6152048.html

[5] LaMonica, Martin. "Google digs into wallet for geothermal energy." Technology News - CNET News. CNET, 19 Aug 2008. Web.  http://news.cnet.com/8301-11128_3-10020038-54.html

[6] "Geothermal Technologies Program: How an Enhanced Geothermal System Works." U.S. DOE Energy Efficiency and Renewable Energy (EERE). US DOE, 11 Dec 2012. Web. http://www1.eere.energy.gov/geothermal/egs_animation.html

[7] LaMonica, Martin. "Google energy guru hot on geothermal." Technology News - CNET News. CNET, 14 May 2009. Web.  http://news.cnet.com/8301-11128_3-10240779-54.html

Isang Paghahambing: ang Pilipinas at ang Australia

Sa pangkalahatan, ang bansang Australia ay isang ubod g progresibo, malinis, at mapayapang lugar. Malawak ang teritoryong sakop ng Australia, at ang bawat isa sa kanyang mga Estado ay maayos ang pamamalakad. 

Sagana rin sa pagpapala ng kalikasan ang Australia. Iba't ibang uri ng mga hayop at halaman ang matatagpuan doon, at marami sa mga ito ang likas na doon lamang matatagpuan, tulad ng mga kangaroo.

Sa kabila nito, ang Australia ay tinukoy bilang pinakamaraming nailalabas na greenhouse gases sa hanay ng mga bansang mauunlad. Ito ay dahil nakaasa ang Australia sa coal at fossil fuels upang tugunan ang kanilang mga pangngailangan sa enerhiya. Dahil sa situwasyong ito, tinutukoy din ang Australia bilang bansang pinakananganganib makaranas ng mga epekto ng climate change.

Para sa Clean Energy Council (CEC) ng Australia, malaking pangangailangan na ang aksyon ng mga pangunahing ekonomiya sa mundo upang mabawasan ang carbon emissions ng planeta upang hindi na lumubha pa ang epekto ng climate change. Kung kaya't nakikita rin ng organisasyon na dapat paigtingin at pabilisin ang paglalatag ng mga clean energy technology at gayundin ang pagsusulong para sa mga panibagong teknolohiyang pang-enerhiya na malinis, sapat sa pangangailangan, at abot-kaya.

Ang geothermal energy ay may potensyal at kakayahan bilang maging pangunahing base load, bukod pa sa kakulangan nito sa mga mapaminsalang carbon emissions. Isa itong mahalagang anyo ng  renewable energy na kayang makapagsuplay ng kuryente na maaaring maging kompetitibo sa pagpepresyo sa kumbensyonal na enerhiyang mula sa mga fossil fuel. At dahil ang Australia ay mayroon ring likas na bukal ng geothermal energy, maaari itong magsilbing isang napakahalagang yamang-enerhiya para sa bansa. Ang pagdulot ng geothermal energy ng kuryente ay tuluy-tuloy at walang tigil, hindi katulad ng hangin o solar na nakadepende sa mga panlabas na salik. Kung kaya’t para sa CEC kung maibibilang ang geothermal energy sa energy mix ng bansa, ito ay magsisilbing mahalagang salik para sa isang hinaharap na sustainable.

Para sa CEC, ang Australia ay may potensyal na magkaroon ng isang sektor ng geothermal na maaaring makilala sa buong daigdig. Ang bansa ay sinasabing magandang  lugar upang linangin ang mga bukal ng geothermal energy nito gamit ang mga panigabong teknolohiya, dala ng pagkakaroon nito ng mahabang kasaysayan sa siyentipikong kalinangan at pagsasaliksik. Gayunpaman, habang maraming mga kumpanya sa bansa ang nakakakita na hindi pa hinog ang kasalukuyang panahon para sa mga teknikal na proof-of-concept, marami na ring mga kumpanya ang nagsasagawa ng mga mahahalagang pagsasaliksik at pagpapalawig upang lalong paghusayin ang mga kasalukyang kaalaman sa geothermal energy o ‘di kaya’y lumikha ng panibaging teknolohiya at metodolohiya.

Gayunpaman, sa kabila ng pangunguna ng Australia sa pagsasaliksik at paglilinang  ng mga di-pangkaraniwang geothermal system, ang pag-engganyo ng kinakailangang kapital at investment ay maaaring maantala kung ikukumpara ang mga lower-risk opportunity na dala ng mga financial incentives mula sa pamahalaanan ng ibang mga bansa. Dahil may kakulangan sa isang malinaw na balangkas para sa polisiya at sa seguridad sa pagpepresyo ng kuryente para sa mga renewable energy developer, para sa CEC nahuhuli pa rin ang Australia kumpara sa ibang mga bansang nag-aalok ng mga insentibo katulad ng mga low cost loan, feed-in tariffs (FITs), risk mitigation scheme at mga private insurance scheme. Ang investment ng pamahalaan, lalo na sa mga pangunahing paksa ng geothermal energy development, ang siyang makapagpapalawak ng pagsusulong ng sektor ng geothermal energy ng Australia. Pagdating rin ng panahoong ito, saka mapapatotohanan ang mga pagtataya sa geothermal energy capacity ng bansa (maximum 2,340 MW; minimum 1,639MW).

Kaugnay ng pagdevelop ng geothermal energy, kung ihahambing natin ang kalagayan ng Australia sa kalagayan ng Pilipinas, kung ang pag-uusapan na rin lang ay ang todo-todong suporta ng pamahalaan, at sa laki ng potensiyal ng enerhiyang ito sa bansa, masasabi nating angat ang Pilipinas. 

Kaya't dapat ay hinahon at masusing pag-aaral ng mga datos ang ating gawin, sa halip na magpatangay tayo agad sa mga haka-haka na lihis sa katotohanan.

Mabuting kapakanan nating mga Pilipino sa kasalukuyan, at sa mga darating pang henerasyon, ang siyang nakataya.

Kasunod: Pagsuporta sa Renewable Energy: Ang Halimbawa ng Google

Bakit Nauudlot ang Proyekto?

Mga pagsubok na kinakaharap ng SBGP

May mga pagsubok na kinakaharap ang Southern Bicol Geothermal Project o SBGP, kung kaya’t hindi nagiging tuloy-tuloy ang pagsasagawa ng proyektong ito ng pamahalaan. Sa madaling sabi, mayroong oposisyon sa proyekto.

Ang oposisyon ay naglahad na sa publiko ng kanilang mga argumento kung bakit diumano ay dapat nang itigil ang geothermal exploration, nang sa gayon ay hindi na maitayo ang geothermal plant balang araw, sakaling mapatunayan sa pamamagitan ng sayentipikong pananaliksik, kung ang potensiyal nga ba ng geothermal energy sa exploration area ay maaring pakinabangan sa nalalapit na hinaharap.

Ilalahad dito ang mga agam-agam ng oposisyon. At bilang pag-ayon sa makatuwirang pagbalangkas, ipahahayag na rin ang mga katotohanan na katapat ng mga agam-agam na ito.

Ipinasa ng local legislative council ng Bulusan ang Bulusan SB Resolution No 55-2011. Ang resolusyon, na lalong nagpatibay sa oposisyon ng lokalidad sa SBGP, ay inaprubahan ni Mayor Michael Guysayco. Ayon sa naturang resolusyon, ipinagbabawal ang kahit anong gawain na may kinalaman sa SBGP sa loob ng jurisdiction ng bayan, na sumasakip sa anim na barangay sa loob ng BVNP. May binuo ring brigada ng mga Wildlife Environmental Officers (WEOs) upang maipatupad ang resolusyon. Ang grupo ay binuo sa ilalim ng “PRESERVE”, na isang United Nations Development Program (UNDP)-funded project na naglalayong makiisa sa mga komunidad sa loob ng BVNP na sakop ng munisipalidad. May 400 miyembro ang grupo mula sa mga barangay sa loob ng BVNP na sakop ng munisipalidad, at sila ay nakatakdang atasan bilang mga forest ranger ng Department of Environment and Natural Resources (DENR).

Ayon kina Celestino Frades and Pedro Frando, mga konehal at mga prinsipal na awtor ng resolusyon, ang mga probisyong nakapaloob rito ay nakabatay sa mga mandatong isinaad ng Republic Act 7586 (ang National Integrated Protected Areas System Act of 1992 o NIPAS) na kumikilala sa kahalagahan ng pagbabantay sa natural biological at physical diversity ng kalikasan. Binabanggit rin ng resolusyon ang Bulusan’s Comprehensive Land Use Plan (CLUP) na isang istratehiyang ekologikal batay sa pagkakaron ng pro-environment na paniniwala ng mga mamamayan. Kinikilala ng CLUP ang kahalagahan ng pagkakaroon ng pagkakaisa laban sa pananamantala ng mga likas na yaman ng lugar.

Ayon kay Arze Glipo, direktor ng Integrated Rural Development Foundation (IRDF), “the people don’t like the project because they know that in similar cases in other areas, water was affected, and of course, the forest and environment as well. We’re not against development, but we’re for development that will benefit a lot of people. Geothermal companies will benefit from the project, but what about the people? Madaming under capacity na geothermal plants that they can improve. Why do they have to exploit pristine areas?” Dagdag pa ni Glipo, hindi lamang nagsisilibi bilang tourist attraction at natural park ang BVNP, ito ay isa ring watershed. Sabi rin niya, naging matipid ang DOE sa pagbibigay ng impormasyon tungkol sa proyekto. Aniya, “Yung information campaign nila is limited to the officials lang…”

Ang iba pang organisasyon na tutol sa SBGP ay anng Coalition of Constituency and Organizations Resiliently Against Geothermal Energy (CONTRA GE), AGAP-Bulusan, Protected Area Management Bureau (PAMB), at Irosin Coalitin Against Geothermal (ICAG).

Ayon kay Ester Hamor, alkalde ng Casiguran, ang epekto ng mga exploration activities ay kinakailangang isaalang-alang muna bago tingnan ang mga ekonomikong bentahe nito. Aniya, “Economic gains are but temporary and short-lived but its effects to the environment would linger up to the generations next to us.” Para naman kay Jaime Fragata, alkalde ng Juban, “I am personally apprehensive over this project because it would involve the possible destruction of our remaining forest resources that serve as our protection from natural calamities like floods, landslides, and volcanic eruptions.” Dagdag pa niya, maraming mga barangay ng Juban ang maaapektuhan kapag nasira ang kagubatan sapagkat ang munisipalidad ay nasa Kanlurang bahagi ng Bulkang Bulusan. Gayunpaman, kalaunan ring inaprubahan ni Fragata ang proyekto para sa bayan. Ang alkalde ay dating nagsilbing empleyado ng BacMan geothermal project sa Sorsogon.

Subalit kung tutuusin, ang mga aprehensyong ito ay nakabatay sa mga haka-haka lamang. sapagkat ang  exploration activities ay isasagawa sa labas lamang ng BVNP. 

Isa pa, bukod sa pagkakaroon ng mga proyektong watershed at reforestation, magkakaroon rin ng programang livelihood ang proyekto na makapagbibigay-trabaho sa mga tao at makapagbabantay sa integridad ng kalikasan, katulad ng pagtatalaga ng mga forest ranger upang bantayan ang kalikasan.

Para kay Peter See, isang mamamayan ng lalawigan, ang SBGP ay makatutulong sa mga lokalidad at komunidad. Para kay See, may pagkukulang ang kaniyang mga kababayan sapagkat bukod sa aniyang patuloy na pagtingin sa proyekto batay sa mga haka-hakang walang pagpapatunay, hindi nila tinitingnan ang labis na pangangailangan ng lalawigan para rito. Ayon rin sa kaniya, ang mga may pinakamasisidhing pagtutol sa proyekto ay hindi naman ang mga karaniwang mamamayan, bagkus ay ang mga may-lupa at nakaririwasa na may angking aprehensyon na maapektuhan ng naturang proyekto ang teritoryo ng kanilang nasasakupan.

Kamukha nito, nakikita rin ni Romeo Polo, isang Municipal Councilor sa Irosin, ang relasyon ng pagsulong ng ekonomiya sa paglinang ng enerhiya, kung kaya’t sinusuportahan niya ang SBGP. Bukod pa rito, pinahahalagaha ni Polo ang paggamit ng renewable energy kabilang ang geothermal energy sa gitna ng lumulubhang problema ng global warming at climate change. Kung kaya, para sa kanya ay hindi makatarungang hindi man lamang mabigyan ng pagkakataong malinang o kahit mapag-aralan ang katutubong bukal ng geothermal energy sa lalawigan.

Kasunod:  Isang Paghahambing: Ang Pilipinas at ang Australia

Bakit Mahalaga Ang Geothermal Energy?

Geothermal Energy: Likas na Yaman ng Pilipinas

Paunang paunawa para sa mga hindi pa nababasa ang blog na ito mula sa kauna-unahang post: ang Southern Bicol Geothermal Project o SBGP ay ang proyekto ng pamahalaang Pilipino, sa pamamagitan ng Department of Energy, upang alamin at tiyakin kung mapapakinabangan nga ba para sa ikabubuti ng nakararami ang geothermal potensiyal sa mga lugar na nakasaad sa Geothermal Service Contract o GRESC na iginawad ng DOE sa SKI. 

Gawa ng pagiging prominente ng Bulkang Bulusan at Bulusan Volcano Natural Park sa Sorsogon, naidikit sa Southern Bicol Geothermal Project ang mga hindi opisyal na alias na tulad ng Bulusan geothermal, Bulusan geothermal plant, Bulusan geothermal project at geothermal exploration Bulusan, Sorsogon.

Ang naturang service contract ay nasa mga munisipalidad ng Juban, Irosin at Bulusan sa lalawigan ng Sorsogon, sa Bicol region. Ang GRESC ay naaayon sa mga plano ng pamahalaan na itaguyod at palawakin ang paggamit ng renewable energy, bilang hakbang tungo sa pangangalaga ng kalikasan sa pamamagitan ng pag-iwas sa pag-gamit ng fossil fuels na nagbubuga ng carbon na bukod sa  nagpapadumi ng kapaligiran, ay sanhi rin ng pagkakabuo ng greenhouse gases. Ang greenhouse gases ay itinuturo bilang sanhi ng hindi regular na pagbabago ng klima sa buong mundo. 

Ang Hangarin ng Pamahalaan Kaugnay ng Renewable Energy

Kaunlaran, Pamumuno at Kasapatan sa Pangangailangang Enerhiya

Ang layunin ng pamahalaan sa pagpapaunlad sa renewable energy ng bansa ay nakabatay sa mga partikular na hangarin para sa hinaharap. Ito ay:

1. upang makilala ang bansa bilang pangunahing geothermal energy producer sa buong mundo,
2. upang makilala ang bansa bilang pangunahing wind energy producer sa Timog-Silangang Asya,
3. doblehin ang kapasidad ng hydro pagsapit ng 2013, at,
4. palaguin ang kontribusyon ng mga enerhiyang biomass, solar, at ocean nang 131 MW.

Para sa hinaharap, ang kapasidad ng bansa na nakabatay sa teknolohiya ng renewable energy ay tinatayang maaaring umabot ng hanggang 9,147 MW pagdating ng taong 2013 – nangangahulugan ito ng 100 porsyentong pagtaas mula sa kasalukuyang antas na 4,449 MW. Ibig sabahin, aabot sa katumbas ng 4,698 MW ang kinakailangang maipatayong mga planta ng renewable energy sa loob ng sampung taon mula 2003.

Ang pagsulong ng bansa tungo sa isang hinaharap na sustainable ay isa sa mga pangunahing layunin ng pamahalaan, kung kaya’t nagisisilbing isang napakahalagang salik ang renewable energy upang makamit ang layuning ito. Ang mga patakarang binubuo kaakibat ng hangaring ito ay nakatuon sa paglikha ng isang market-based environment na kaakit-akit sa pamumuhunan ng mga mangangalakal, at sa partisipasyon ng pribadong sektor (at gayundin ang pag-engganyo ng technology transfer at pagsasaliksik). 

Ang mga pangkasalukuyang instentibong pampiskalya ay binuo na may pagkiling sa mga teknolohiya ng renewable energy at maging sa mga proyektong environmentally-friendly.

  

Isang alternatibong senaryo rin ang kinilatis kung saan pinag-aralan ang epekto ng pagkakaroon ng mas malaking bahagdan ng renewable energy sa installed generating capacity ng bansa. Ito ay nakaayon sa pagsusulong ng mga namamayaning programa at istratehiya, sa pagkilala sa mas mataas na production targets, sa paglikha ng naturang market-based environment, at sa pagkakaroon ng akses sa mga makabagong financing schemes katula ng Clean Development Mechanism (CDM).

Samakatuwid, kinikilala ng DOE na may dalawang pangunahing layuning long-term na pawang kinakailangang maisakatuparan upang maisulong ang pagpapaunlad at paggamit sa renewable energy: ang pagpapalago ng renewable energy-based capacity ng bansa nang 100 porsyento pagsapit ng 2013; at ang pagpapalago ng kontribusyong non-power ng renewable energy sa pambansang energy mix upang tumumbas sa 10 million barrels of fuel oil equivalent (MMBFOE) sa loob ng susunod na sampung taon.

Ang mga proyektong nililikha ng pamahalaan ay nakatuon sa pag-engganyo ng mas maraming mga invesment mula sa pribadong sektor. May mga programa ring nililikha upang ipagsulong ang potensyal ng mga renewable energy technology at upang makilala ang mga ito bilang alternatibo at kompetitibong anyo ng enerhiya. May 30 isla sa bansa ang nilalayong mabigyan ng kuryente sa pamamagitan ng renewable energy hybrid power system. May 1,500 mga barangay rin ang nilalayong mabigyan ng kuryente sa pamamagitan ng pagkabit ng renewable energy system.

Kasunod:    Bakit Mahalaga ang Geothermal Energy?

Bakit Sinusuportahan ng WWF ang Renewable Energy?

WWF: 100 porsyentong renewable energy pagsapit ng 2050

Ang WorldWildlife Fund for Nature (WWF) ay nagbibigay ng kaukulang pagsuporta at naglulunsad rin ng mga kaakibat na inisyatibo upang ipagsulong ang higit na malawakang paggamit ng renewable energy. Para sa organisasyon, sadyang kinakailangan na ng planeta ang tuluyang pagpapalit ng mga nakaugaliang anyo ng enerhiya dahil ang mga ito ay hindi sustainable. Sa halip, nararapat na gamitin lamang ang renewable energy para sa mga pangangailangan sa enerhiya ng mundo. Para sa WWF, ito lamang ang magsisilbing paraan upang maiwasan ang mga pinakamalubhang epekto ng climate change – at ang pagbabagong ito ay kinakailangan na sa lalong madaling panahon.

Ayon sa mga pag-aaral, ang planeta ay nasa rurok na ng extraction o paghugot mula sa ilalim ng lupa, kung ang pag-uusapan ay ang mga fossil fuels, tulad ng petrolyo at gas. Ibig sabihin, higit na lumalalim ang kinakailangang hukayin, at higit na lumalayo sa kumbensyonal na pamamaraan ang ginagagamit para rito (katulad ng shale extraction at fracking).

Sa kasamaang palad, ang mga ito ay pawang may hindi magagandang epekto sa kalikasan at lipunan. Ang likas na supply ng carbon (coal) ay sasapat pa rin, subalit kahit ito ay hindi kaiba sa pagkakaroon ng hindi magandang epekto sa klima ng mundo. Samakatuwid, hindi na katanggap-tanggap ang patuloy na paggamit ng mga fossil fuels lalo pa kung ito ay patatagalin hanggang sa hinaharap.

Pagsapit ng taong 2050, ang mamamayaning anyo ng enerhiya ay ang kuryente. Nangangahulugan ito na kinakailangan ring magkaroon ng isang mahusay na sistema upang mai-transport ang kuryente sa mga konsyumer; samakatuwid, kinakailangan rin ang mga investment para sa mga makabagong “intelligent” electricity grids.

Ang kuryente ay mahalaga sa pagpapatakbo ng mga pangunahing serbisyo katulad ng serbisyong pangkalusugan at edukasyon. Subalit sa kasulukuyan, tinatayang may 1.4 bilyong katao sa buong mundo ang wala pa ring maasahang mapagkukunan ng kuryente, habang may 2.7 bilyong katao ang gumagamit pa rin ng mga anyong biomass na hindi sustainable para sa pagluluto at paghahanda ng pagkain. 

Dala nito, aabot sa 2 milyon ang namamatay kada taon mula sa paglanghap ng nakalalasong usok mula sa mga makalumang kalang ito. Sa kasamaang palad, dahil tinataya ng mga pag-aaral na dodoble ang antas ng demand sa enerhiya sa buong mundo pagsapit ng 2050, masasabing ang mga kundisyong ito ay lalo pang lalala sa pagdaan ng panahon.

Sa pamamagitan ng pag-aaral ng WWF na inilimbag bilang, “The Energy Report: 100% Renewable Energy by 2050”, nagbibigay ang organisasyon ng sampung rekomendasyon upang makamit ang hangarin para sa isang hinaharap na tuluyang gagamit ng renewable energy para sa mga pangangailangan ng mundo[1].

1.    Malinis na enerhiya – Ipakilala lamang ang mga pinakamahuhusay na produkto. Linangin ang mga kasalukuyan at bagong anyo ng mga bukal ng renewable energy upang matugunan ang magiging pangangailangan pagsapit ng taong 2050.

2.    Mga grid – Makipagpalitan ng malinis na enerhiya sa pamamagitan ng mga grid at kalakalan, at paghusayin ang paggamit ng mga bukal ng enehiyang sustainable na matatagpuan sa iba’t-ibang lugar.

3.    Access – Tapusin na ang kahirapan sa enerhiya sa pamamagitan ng paglilinang ng malinis na kuryenye at mga gawaing sustainable sa mga developing countries, katulad halimbawa ng paggamit ng tamang uri ng mga kalan.

4.  Pera – Mag-invest sa mga produkto at gusaling renewable, malinis, at energy-efficient.

5.   Pagkain – Huwag mag-aksaya ng pagkain. Hangga’t maari ay piliin lamang ang mga pagkaing mula sa pagprosesong sustainable upang magkaroon pa ng mga lupain para sa kalikasan, sustainable forestry, at produksyon ng mga biofuel. At dahil ang lahat ay may karapatan sa pagkakaroon ng sapat na nutrisyon ng protina, kinakailangang bawasan ng mga nakaluluwag na tao ang pagkonsumo ng karne.

6.  Materyales – Reduce, re-use, recycle. Kinakailangan ito upang mabawasan ang bulto ng tinatapon at upang hindi masayang ang enerhiya. Mahalagang linangin ang mga materyal na durable, at gayundin ang umiwas sa mga kagamitang hindi kinakailangan.

7.    Transportasyon – Kinakailangan magbigay ng mga insentibo upang maengganyo ang mga taong gumamit ng pampublikong transportasyon, at gayundin ang mabawasan ang distansya ng pagbyahe. Hangga’t maaari ay isulong ang elektripikasyon, at gayundin suportahan ang mga pagsasaliksik tungkol sa hydrogen at iba pang mga maaaring alternatibo para sa paglalayag at pagpapalipad.

8.    Teknolohiya – Isulong ang mga planong pambansa, bilateral, at multilateral na nauukol sa pagsasaliksik at paglilinang ng enerhiya at renewable energy.

9.  Sustainability – Linangin at ipatupad ang striktong mga pamantayan upang maseguro na ang renewable energy ay nakaayon pa rin sa mga layuning pangkalikasan at panglinang.

10. Pakikipag-ugnayan – Magbigay-suporta sa mga agreement na nakatuon sa klima at enerhiya upang makapagbigay ng pandaigdigang pagbabantay at maisulong ang pandaigdigang kooperasyon at pagpupunyagi sa renewable energy.

Kasunod: Ang Hangarin ng Pamahalaan Kaugnay ng Renewable Energy

---

[1] Salin sa Filipino mula sa The Energy Report: 100% Renewable Energy by 2050. (2011): 8-9. Web

Renewable Energy Para sa Maalwang Kinabukasan ng Pilipinas

Mula sa Pangarap, Patungo sa Magandang Katotohanan

Simula sa taong 2013, tinataya ng Department of Energy (DOE) na mapupunan ng renewable energy ang 40 porsyento ng pangunahing pangangailangang pang-enerhiya ng bansa sa loob ng susunod na sampung taon. Ang antas ng paglago ng renewable energy ay tinatayang papatak ng 2.4 porsyeto kada taon[1]. Gayunpaman, sa loob ng panahong ito ang pambansang halaga ng renewable energy ay bababa kung ihahambing sa kabuuang halaga ng pambansang enerhiya.

Sa kasalukuyan, ang mga anyo ng renewable energy na may pinakamalalaking kontribusyon sa kabuuang enerhiya ng bansa ay ang biomass, hydro, solar at hangin. Kung isusuma, ang mga ito ay bubuo sa 27.5 porsyento ng kabuuang enerhiya. Tinatayang lalaki ang kontribusyon ng hydro at geothermal sa balanseng ito[2]; sa hinaharap ay nakikitang malaki ang papel na gagampanan ng mga ito bilang yamang-enerhiya na maaaring pagmulan ng kuryente. Katunayan, ang pinaigting na paggamit ng geothermal at hydro ang siyang nagtulak upang mabawasan ang nakasanayang paggamit ng bansa sa inaangkat na mga produktong petrolyo.

Samakatuwid, ang pagsulong ng renewable energy ay nananatiling isang mahalagang kasangkapan upang maisakatuparan ng pamahalaang pambansa ang istratehiya nito upang mapunan ang malawak na pangangailangan sa enerhiya at gayon na rin ang pagbibigay-seguridad sa energy access para sa bawat mamamayan. Ang pinalawak na paggamit ng iba pang mga anyo ng renewable energy katulad ng biomass, hydro, solar at hangin ay siyang nagsisilbing mahalagang batayan upang masaksihan ng mga mamamayan ang pagpupunyagi ng pamahalaang isulong ang elektripikasyon ng mga rural na pook.

Kasunod: Bakit Sinusuportahan ng WWF ang Renewable Energy?

---

[1] "Renewable Energy." DOE Portal. Department of Energy, 2005. Web.

 http://www.doe.gov.ph/er/renenergy.htm

[2] Ibid.

Ang Pagpapahalaga ng Pamahalaan sa Renewable Energy

Ang Renewable Energy at ang Pilipinas

Maraming hakbang ang tinatahak ng pamahalaan upang maisulong ang Pilipinas tungo sa isang magandang hinaharap sa pamamagitan ng sustainable development. Upang maisakatuparan ito, ang mga mamamayan at mga industriya ay kinakailangang mabigyan ng seguridad sa enerhiya. 

Gayundin, mahalaga ring kilalanin ang pagkakaroon ng isang balangkas na makabubuti para sa kalikasan upang maisakatuparan ang minimithing sustainable development. Ito ay makikita sa pagsasabatas ng Republic Act 9513 o ang Renewable Energy Act ng 2008 kung saan nakabatay ang National Renewable Energy Plan o NREP.

Ang mga yamang-enerhiya ng bansa na renewable ay hindi lamang maaaring magsilbing mahalagang salik upang makapagbigay ng seguridad sa enerhiya at daan para higit na maraming mamamayan ang makapakinabang sa malinis na uri na ito ng enerhiya.

Ang mga anyo ng renewable energy ay makapagbibigay rin ng alternatibong solusyon sa mga problemang kaakibat ng malawakang paggamit ng mga produktong petrolyo katulad ng pagtaas ng presyo nito sa pandaigdigang merkado at pagtaas ng carbon emissions. Ang sektor ng renewable energy ay idineklara ng pamahalaan bilang mahalagang bahagi ng Investment Priorities Plan (IPP) ng bansa.

Kasunod:   Renewable Energy  Para sa Maalwang Kinabukasan ng Pilipinas